Молитвы ко Святому Причащению

Молитва 1-я, святого Василия Великого

Влады́ко Го́споди Иису́се Христе́, Бо́же на́ш, Исто́чниче жи́зни и безсме́ртия, всея́ тва́ри ви́димыя и неви́димыя Соде́телю, безнача́льнаго Отца́ соприсносу́щный Сы́не и собезнача́льный, премно́гия ра́ди бла́гости в после́дния дни́ в пло́ть оболки́йся, и распны́йся, и погребы́йся за ны́ неблагода́рныя и злонра́вныя, и Твое́ю Кро́вию обнови́вый растле́вшее грехо́м естество́ на́ше, Са́м, Безсме́ртный Царю́, приими́ и мое́ гре́шнаго покая́ние, и приклони́ у́хо Твое́ мне́, и услы́ши глаго́лы моя́.

Согреши́х бо, Го́споди, согреши́х на не́бо и пред Тобо́ю, и не́смь досто́ин воззре́ти на высоту́ сла́вы Твоея́: прогне́вах бо Твою́ бла́гость, Твоя́ за́поведи преступи́в, и не послу́шав Твои́х повеле́ний. Но Ты́, Го́споди, незло́бив сы́й, долготерпели́в же и многоми́лостив, не пре́дал еси́ мя́ поги́бнути со беззако́ньми мои́ми, моего́ вся́чески ожида́я обраще́ния.

Ты́ бо ре́кл еси́, Человеколю́бче, проро́ком Твои́м: я́ко хоте́нием не хощу́ сме́рти гре́шника, но е́же обрати́тися и жи́ву бы́ти ему́. Не хо́щеши бо, Влады́ко, созда́ния Твое́ю руку́ погуби́ти, ниже́ благоволи́ши о поги́бели челове́честей, но хо́щеши все́м спасти́ся, и в ра́зум и́стины приити́. Те́мже и а́з, а́ще и недосто́ин е́смь небесе́ и земли́, и сея́ привре́менныя жи́зни, всего́ себе́ повину́в греху́, и сласте́м порабо́тив, и Тво́й оскверни́в о́браз; но творе́ние и созда́ние Твое́ бы́в, не отчаява́ю своего́ спасе́ния окая́нный, на Твое́ же безме́рное благоутро́бие дерза́я, прихожду́.

Приими́ у́бо и мене́, Человеколю́бче Го́споди, я́коже блудни́цу, я́ко разбо́йника, я́ко мытаря́ и я́ко блу́днаго, и возми́ мое́ тя́жкое бре́мя грехо́в, гре́х взе́мляй ми́ра, и не́мощи челове́ческия исцеля́яй, тружда́ющияся и обремене́нныя к Себе́ призыва́яй и упокоева́яй, не прише́дый призва́ти пра́ведныя, но гре́шныя на покая́ние.

И очи́сти мя́ от вся́кия скве́рны пло́ти и ду́ха, и научи́ мя́ соверша́ти святы́ню во стра́се Твое́м: я́ко да чи́стым све́дением со́вести моея́, святы́нь Твои́х ча́сть прие́мля, соединю́ся свято́му Те́лу Твоему́ и Кро́ви, и име́ю Тебе́ во мне́ живу́ща и пребыва́юща, со Отце́м, и Святы́м Твои́м Ду́хом.

Е́й, Го́споди Иису́се Христе́, Бо́же мо́й, и да не в су́д ми́ бу́дет прича́стие пречи́стых и животворя́щих Та́ин Твои́х, ниже́ да не́мощен бу́ду душе́ю же и те́лом, от е́же недосто́йне те́м причаща́тися, но да́ждь ми́, да́же до коне́чнаго моего́ издыха́ния, неосужде́нно восприима́ти ча́сть святы́нь Твои́х, в Ду́ха Свята́го обще́ние, в напу́тие живота́ ве́чнаго, и во благоприя́тен отве́т на Стра́шнем суди́щи Твое́м: я́ко да и а́з со все́ми избра́нными Твои́ми о́бщник бу́ду нетле́нных Твои́х бла́г, я́же угото́вал еси́ лю́бящим Тя́, Го́споди, в ни́хже препросла́влен еси́ во ве́ки. Ами́нь.

Молитва 2-я, святого Иоанна Златоустого

Го́споди Бо́же мо́й, ве́м, я́ко не́смь досто́ин, ниже́ дово́лен, да под кро́в вни́деши хра́ма души́ моея́, зане́же ве́сь пу́ст и па́лся е́сть, и не и́маши во мне́ ме́ста досто́йна е́же главу́ подклони́ти; но я́коже с высоты́ на́с ра́ди смири́л еси́ Себе́, смири́ся и ны́не смире́нию моему́: и я́коже восприя́л еси́ в верте́пе и в я́слех безслове́сных возлещи́, си́це восприими́ и в я́слех безслове́сныя моея́ души́, и во оскверне́нное мое́ те́ло вни́ди. И я́коже не неудосто́ил еси́ вни́ти и свечеря́ти со гре́шники в дому́ Си́мона прокаже́ннаго, та́ко изво́ли вни́ти и в до́м смире́нныя моея́ души́, прокаже́нныя и гре́шныя: и я́коже не отри́нул еси́ подо́бную мне́ блудни́цу и гре́шную, прише́дшую и прикосну́вшуюся Тебе́, си́це уми́лосердися и о мне́ гре́шнем, приходя́щем и прикаса́ющемся Тебе́: и я́коже не возгнуша́лся еси́ скве́рных тоя́ у́ст и нечи́стых, лобза́ющих Тя́, ниже́ мои́х возгнуша́йся скве́рнших о́нех у́ст и нечи́стших, ниже́ ме́рзких мои́х и нечи́стых усте́н, и скве́рнаго и нечи́стейшаго моего́ язы́ка. Но да бу́дет ми́ у́гль пресвята́го Твоего́ Те́ла, и честны́я Твоея́ Кро́ве во освяще́ние и просвеще́ние и здра́вие смире́нней мое́й души́ и те́лу, во облегче́ние тя́жестей мно́гих мои́х согреше́ний: в соблюде́ние от вся́каго диа́вольскаго де́йства: во отгна́ние и возбране́ние зла́го моего́ и лука́ваго обы́чая: во умерщвле́ние страсте́й: в снабде́ние за́поведей Твои́х: в приложе́ние Боже́ственныя Твоея́ благода́ти, и Твоего́ Ца́рствия присвое́ние. Не бо́ я́ко презира́я прихожду́ к Тебе́, Христе́ Бо́же, но я́ко дерза́я на неизрече́нную Твою́ бла́гость, и да не на мно́зе удаля́яйся обще́ния Твоего́, от мы́сленнаго во́лка звероулови́мь бу́ду. Те́мже молю́ся Тебе́: я́ко еди́н Святы́й, Влады́ко, освяти́ мою́ ду́шу и те́ло, у́м и се́рдце, чре́сла и утро́бу, и всего́ мя́ обнови́, и вкорени́ стра́х Тво́й во удесе́х мои́х, и освяще́ние Твое́ неотъе́млемо от мене́ сотвори́: и бу́ди ми́ помо́щник и засту́пник, окормля́я в ми́ре живо́т мо́й, сподобля́я мя́ и одесну́ю Тебе́ предстоя́ния со святы́ми Твои́ми, моли́твами и моле́ньми Пречи́стыя Твоея́ Ма́тере, невеще́ственных Твои́х служи́телей и пречи́стых Си́л, и все́х святы́х, от ве́ка Тебе́ благоугоди́вших. Ами́нь.

Молитва 3-я, преподобного Симеона Метафраста

Еди́не чи́стый и нетле́нный Го́споди, за неизрече́нную ми́лость человеколю́бия на́ше восприе́мый смеше́ние, от чи́стых и де́вственных крове́й па́че естества́ Ро́ждшия Тя́, Ду́ха Боже́ственнаго наше́ствием, и благоволе́нием Отца́ присносу́щнаго, Христе́ Иису́се, прему́дросте Бо́жия, и ми́ре, и си́ло; восприе́мый Те́лом Твои́м животворя́щая и спаси́тельная стра́сти, кре́ст, гво́здие, копие́, сме́рть, умертви́ моя́ душетле́нныя стра́сти теле́сныя. Погребе́нием Твои́м а́довагубителя пресекий, помышле́ний мои́х лука́выя сове́ты погреби́ благи́ми по́мыслы, и лука́выя ду́хи разжени́. Тридне́вным Твои́м и живоно́сным Воскресе́нием па́дшаго пра́отца возста́вивый, возста́ви мя́ грехо́м попо́лзшася, о́бразы мне́ покая́ния предлага́я. Пресла́вным Твои́м Вознесе́нием, пло́ти обожи́вый восприя́тие, и сию́ десны́м седе́нием Отца́ почты́й, сподо́би мя́ прича́стием святы́х Твои́х Та́ин десну́ю ча́сть спаса́емых получи́ти. Соше́ствием Уте́шителя Ду́ха сосу́ды че́стны Твоя́ свяще́нныя ученики́ соде́лавый, прия́телище и мене́ покажи́ Того́ прише́ствия. Хотя́й па́ки приити́ суди́ти вселе́нней пра́вдою, благоволи́ и мне́ усре́сти Тебе́ на о́блацех, Судию́ и Созда́теля моего́, со все́ми святы́ми Твои́ми: да безконе́чно славосло́влю и воспева́ю Тя́, со безнача́льным Твои́м Отце́м, и Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в. Ами́нь.

Молитва 4-я, преподобного Иоанна Дамаскина

Влады́ко Го́споди Иису́се Христе́, Бо́же на́ш, еди́не име́яй вла́сть челове́ком оставля́ти грехи́, я́ко Бла́г и Человеколю́бец, пре́зри моя́ вся́ согреше́ния, я́же в ве́дении и не в ве́дении, и сподо́би мя́ неосужде́нно причасти́тися Боже́ственных, и пресла́вных, и пречи́стых, и животворя́щих Твои́х Та́ин, не в тяготу́, ни в му́ку, ни в приложе́ние грехо́в, но во очище́ние, и освяще́ние, и обруче́ние бу́дущаго живота́ и Ца́рствия, в сте́ну и по́мощь, и возноше́ние супоста́тов, во истребле́ние мно́гих мои́х согреше́ний. Ты́ бо еси́ Бо́г ми́лости, и щедро́т, и человеколю́бия, и Тебе́ сла́ву возсыла́ем, со Отце́м, и Святы́м Ду́хом, ны́не и при́сно, и во ве́ки веко́в. Ами́нь.

Молитва 5-я, святого Василия Великого

Ве́м, Го́споди, я́ко недосто́йне причаща́юся пречи́стаго Твоего́ Те́ла и честны́я Твоея́ Кро́ве, и пови́нен е́смь, и су́д себе́ ям и пию́, не разсужда́я Те́ла и Кро́ве Тебе́ Христа́ и Бо́га моего́, но на щедро́ты Твоя́ дерза́я прихожду́ к Тебе́ ре́кшему: яды́й Мою́ Пло́ть, и пия́й Мою́ Кро́вь, во Мне́ пребыва́ет, и Аз в не́м. Уми́лосердися у́бо, Го́споди, и не обличи́ мя́ гре́шнаго, но сотвори́ со мно́ю по ми́лости Твое́й; и да бу́дут ми́ свята́я сия́ во исцеле́ние, и очище́ние, и просвеще́ние, и сохране́ние, и спасе́ние, и во освяще́ние души́ и те́ла; во отгна́ние вся́каго мечта́ния, и лука́ваго дея́ния, и де́йства диа́вольскаго, мы́сленне во удесе́х мои́х де́йствуемаго: в дерзнове́ние и любо́вь я́же к Тебе́: во исправле́ние жития́ и утвержде́ние: в возраще́ние доброде́тели и соверше́нства: во исполне́ние за́поведей: в Ду́ха Свята́го обще́ние: в напу́тие живота́ ве́чнаго, и во отве́т благоприя́тен на Стра́шнем суди́щи Твое́м: не в су́д, или́ во осужде́ние.

Молитва 6-я, преподобного Симеона Нового Богослова

От скве́рных усте́н, от ме́рзкаго се́рдца, от нечи́стаго язы́ка, от души́ оскверне́ны, приими́ моле́ние, Христе́ мо́й, и не отри́нув ни словеса́ моя́, ни обы́чаи, ни безсту́дие, да́ждь ми́ дерзнове́нно глаго́лати, я́же хощу́, Христе́ мо́й, па́че же и научи́ мя́, что́ ми́ подоба́ет твори́ти и глаго́лати. Согреши́х па́че блудни́цы, я́же уве́девши, где́ обита́еши, ми́ро купи́вши, прии́де де́рзостне пома́зати Твои́ но́зе, Бо́га моего́, Влады́ки и Христа́ моего́. Я́коже о́ну не отри́нул еси́ прише́дшую от се́рдца, ниже́ мене́ возгнуша́йся, Сло́ве, Твои́ же ми́ пода́ждь но́зе, и держа́ти и целова́ти, и струя́ми сле́зными, я́ко многоце́нным ми́ром, де́рзостно пома́зати. Омы́й мя́ слеза́ми мои́ми, очи́сти мя́ и́ми, Сло́ве. Оста́ви и согреше́ния моя́, и проще́ние ми́ пода́ждь. Ве́си злы́х мно́жество, ве́си и стру́пы моя́, и я́звы зри́ши моя́, но и ве́ру ве́си, и произволе́ние зри́ши, и воздыха́ние слы́шиши. Не таи́тся Тебе́, Бо́же мо́й, Тво́рче мо́й, Изба́вителю мо́й, ниже́ ка́пля сле́зная, ниже́ ка́пли ча́сть не́кая. Несоде́ланное мое́ ви́десте о́чи Твои́, в кни́зе же Твое́й и еще́ несоде́янная напи́сана Тебе́ су́ть. Ви́ждь смире́ние мое́, ви́ждь тру́д мо́й ели́к, и грехи́ вся́ оста́ви ми́, Бо́же все́ческих: я́ко да чи́стым се́рдцем, прича́стною мы́слию, и сокруше́нною душе́ю, нескве́рных Твои́х причащу́ся и пресвяты́х Та́ин, и́миже оживля́ется и обожа́ется вся́к яды́й же и пия́й чи́стым се́рдцем: Ты́ бо ре́кл еси́, Влады́ко мо́й: вся́к яды́й Мою́ Пло́ть, и пия́й Мою́ Кро́вь, во Мне́ у́бо се́й пребыва́ет, в не́м же и Аз е́смь. И́стинно сло́во вся́ко Влады́ки и Бо́га моего́: Боже́ственныя бо причаща́яйся, и боготворя́щия благода́ти, не у́бо е́смь еди́н, но с Тобо́ю, Христе́ мо́й, Све́том трисо́лнечным, просвеща́ющим ми́р. Да у́бо не еди́н пребыва́я без Тебе́ Жизнода́вца, дыха́ния моего́, живота́ моего́, ра́дования моего́, спасе́ния ми́ру: сего́ ра́ди к Тебе́ приступи́х, я́коже зри́ши, со слеза́ми, и душе́ю сокруше́нною, избавле́ния мои́х прегреше́ний прошу́ прия́ти ми́, и Твои́х животворя́щих и непоро́чных Та́инств неосужде́нно причасти́тися, да пребу́деши, я́коже ре́кл еси́, со мно́ю треока́янным: да не кроме́ обре́т мя́ Твоея́ благода́ти, преле́стник восхи́тит мя́ кова́рне, и прельсти́в отведе́т боготворя́щих Твои́х слове́с. Сего́ ра́ди к Тебе́ припа́даю, и те́пле вопию́ Ти́: я́коже блу́днаго прия́л еси́, и блудни́цу прише́дшую, си́це приими́ мя́ блу́днаго и скве́рнаго, Ще́дре. Душе́ю сокруше́нною ны́не к Тебе́ приходя́ща. Ве́м, Спа́се, я́ко и́н, я́коже а́з, не прегреши́ Тебе́, ниже́ соде́я дея́ния, я́же а́з соде́ях. Но и сие́ па́ки ве́м, я́ко не вели́чество прегреше́ний, ни грехо́в мно́жество превосхо́дит Бо́га моего́ мно́гое долготерпе́ние, и человеколю́бие кра́йнее: но ми́лостию сострада́ния те́пле ка́ющияся, и очища́еши, и светли́ши, и све́ту причастники́ соде́лываеши, обще́ники Божества́ Твоего́ соде́ловая ще́дро: и стра́нно а́нгелом и челове́ческим мы́слем бесе́дуеши с ни́ми мно́гажды, я́коже со дру́ги Твои́ми и́стинными. Сия́ дерза́ти мя́ творя́т, сия́ вперя́ют мя́ к Тебе́, Христе́ мо́й. И дерзнове́ние име́я мно́жества ра́ди благодея́ний Твои́х, ра́дуяся вку́пе и трепеща́, огне́ви причаща́юся, трава́ сы́й, и стра́нно чу́до, ороша́емь неопа́льне, я́коже у́бо купина́ дре́вле неопа́льне горя́щи. Ны́не благода́рною мы́слию, благода́рным же се́рдцем, благода́рными уды́ мои́ми, души́ и те́ла моего́, покланя́юся, и велича́ю, и славосло́влю Тя́, Бо́же мо́й, я́ко благослове́нна су́ща, ны́не и во ве́ки.

Молитва 7-я, святого Иоанна Златоустого

Бо́же, осла́би, оста́ви, прости́ ми́ согреше́ния моя́, ели́ка Ти́ согреши́х, а́ще сло́вом, а́ще де́лом, а́ще помышле́нием, во́лею или́ нево́лею, ра́зумом или́ неразу́мием, вся́ ми́ прости́, я́ко Бла́г и Человеколю́бец: и моли́твами Пречи́стыя Твоея́ Ма́тере, у́мных Твои́х служи́телей и святы́х Си́л, и все́х святы́х, от ве́ка Тебе́ благоугоди́вших, неосужде́нно благоволи́ прия́ти ми́ свято́е и пречи́стое Твое́ Те́ло и честну́ю Кро́вь, во исцеле́ние души́ же и те́ла, и во очище́ние лука́вых мои́х помышле́ний. Я́ко Твое́ е́сть Ца́рство, и си́ла, и сла́ва, со Отце́м, и Святы́м Ду́хом, ны́не и при́сно, и во ве́ки веко́в. Ами́нь.

Молитва 8-я, того же

Не́смь дово́лен, Влады́ко Го́споди, да вни́деши под кро́в души́ моея́: но поне́же хо́щеши Ты́, я́ко Человеколю́бец, жи́ти во мне́, дерза́я приступа́ю. Повелева́еши, да отве́рзу две́ри, я́же Ты́ еди́н созда́л еси́, и вни́деши с человеколю́бием, я́коже еси́: вни́деши, и просвеща́еши помраче́нный мо́й по́мысл. Ве́рую, я́ко сие́ сотвори́ши: не бо́ блудни́цу со слеза́ми прише́дшую отгна́л еси́, ниже́ мытаря́ отве́ргл еси́ пока́явшася, ниже́ разбо́йника позна́вша Ца́рствие Твое́ отгна́л еси́, ниже́ гони́теля пока́явшася оста́вил, я́коже бе́: но от покая́ния прише́дшия вся́, в ли́це Твои́х другов учини́л еси́, еди́н сы́й благослове́нный всегда́, ны́не и в безконе́чныя ве́ки. Ами́нь.

Молитва 9-я, того же

Го́споди Иису́се Христе́, Бо́же мо́й, осла́би, оста́ви, очи́сти и прости́ ми́ гре́шному, и непотре́бному, и недосто́йному рабу́ Твоему́, прегреше́ния, и согреше́ния, и грехопаде́ния моя́, ели́ка Ти́ согреши́х от ю́ности моея́ да́же до настоя́щаго дне́ и часа́, а́ще в ра́зуме и в неразу́мии, а́ще в словесе́х или́ в де́лех, а́ще в помышле́ниих и мы́слех, и во все́х мои́х чу́вствах. И моли́твами безсе́меннно Ро́ждшия Тя́ Пречи́стыя и Присноде́вы Мари́и Ма́тере Твоея́, еди́ныя непосты́дныя наде́жди и предста́тельства и спасе́ния моего́, сподо́би мя́ неосужде́нно причасти́тися пречи́стых, безсме́ртных, животворя́щих и стра́шных Твои́х Та́инств, во оставле́ние грехо́в, и в жи́знь ве́чную, во освяще́ние, и просвеще́ние, кре́пость, исцеле́ние, и здра́вие души́ же и те́ла, и во истребле́ние и всеконе́чное погубле́ние лука́вых мои́х по́мыслов, и помышле́ний, и предприя́тий, и нощны́х мечта́ний те́мных и лука́вых ду́хов: я́ко Твое́ е́сть Ца́рство, и си́ла, и сла́ва, и че́сть, и поклоне́ние, со Отце́м, и Святы́м Твои́м Ду́хом, ны́не и при́сно, и во ве́ки веко́в. Ами́нь.

Молитва 10-я, преподобного Иоанна Дамаскина

Пред две́рьми хра́ма Твоего́ предстою́, и лю́тых помышле́ний не отступа́ю: но Ты́, Христе́ Бо́же, мытаря́ оправди́вый, и Ханане́ю поми́ловавый, и разбо́йнику ра́я две́ри отве́рзый, отве́рзи ми́ утро́бы человеколю́бия Твоего́, и приими́ мя́ приходя́ща и прикаса́ющася Тебе́, я́ко блудни́цу и кровоточи́вую: о́ва у́бо вскри́лия ри́зы Твоея́ косну́вшися, удо́бь исцеле́ние прия́т, о́ва же пречи́стеи Твои́ но́зе оде́ржавши, разреше́ние грехо́в понесе́. А́з же окая́нный, все́ Твое́ Те́ло дерза́я восприя́ти, да не опале́н бу́ду: но приими́ мя́, я́коже о́ныя, и просвети́ моя́ душе́вная чу́вствия, попаля́я моя́ грехо́вныя вины́, моли́твами безсе́менно Ро́ждшия Тя́, и небе́сных Си́л: я́ко благослове́н еси́ во ве́ки веко́в. Ами́нь.

Молитва святого Иоанна Златоустого

Ве́рую, Го́споди, и испове́дую, я́ко Ты́ еси́ вои́стинну Христо́с, Сы́н Бо́га жива́го, прише́дый в ми́р гре́шныя спасти́, от ни́хже пе́рвый е́смь а́з. Еще́ ве́рую, я́ко сие́ е́сть са́мое пречи́стое Те́ло Твое́, и сия́ е́сть са́мая честна́я Кро́вь Твоя́. Молю́ся у́бо Тебе́: поми́луй мя́, и прости́ ми́ прегреше́ния моя́, во́льная и нево́льная, я́же сло́вом, я́же де́лом, я́же ве́дением и неве́дением, и сподо́би мя́ неосужде́нно причасти́тися пречи́стых Твои́х Та́инств, во оставле́ние грехо́в, и в жи́знь ве́чную. Ами́нь.

Стихи, читаемые при приближении к Чаше (преподобного Симеона Метафраста)

[Приходя причаститься, произноси мысленно эти стихи преподобного Симеона Метафраста:]

Се́ приступа́ю к Боже́ственному Причаще́нию. Соде́телю, да не опали́ши мя́ приобще́нием: О́гнь бо еси́, недосто́йныя попаля́яй. Но у́бо очи́сти мя́ от вся́кия скве́рны.

[Затем:]

Ве́чери Твоея́ та́йныя дне́сь, Сы́не Бо́жий, прича́стника мя́ приими́; не бо враго́м Твои́м та́йну пове́м, ни лобза́ния Ти́ да́м, я́ко Иу́да, но я́ко разбо́йник испове́даю Тя́: помяни́ мя́, Го́споди, во Ца́рствии Твое́м.

[И стихи:]

Боготворя́щую Кро́вь ужасни́ся, челове́че, зря́: О́гнь бо е́сть, недосто́йныя попаля́яй. Боже́ственное Те́ло и обожа́ет мя́ и пита́ет: Обожа́ет ду́х, у́м же пита́ет стра́нно.

[Потом тропари:]

Услади́л мя́ еси́ любо́вию, Христе́, и измени́л мя́ еси́ Боже́ственным Твои́м раче́нием; но попали́ огне́м невеще́ственным грехи́ моя́, и насы́титися е́же в Тебе́ наслажде́ния сподо́би: да лику́я возвелича́ю, Бла́же, два́ прише́ствия Твоя́.

Во све́тлостех Святы́х Твои́х ка́ко вни́ду недосто́йный? А́ще бо дерзну́ совни́ти в черто́г, оде́жда мя́ облича́ет, я́ко не́сть бра́чна, и свя́зан изве́ржен бу́ду от А́нгелов. Очи́сти, Го́споди, скве́рну души́ моея́, и спаси́ мя́, я́ко Человеколю́бец.

[Также молитву:]

Влады́ко Человеколю́бче, Го́споди Иису́се Христе́ Бо́же мо́й, да не в су́д ми́ бу́дут Свята́я сия́, за е́же недосто́йну ми́ бы́ти: но во очище́ние и освяще́ние души́ же и те́ла, и во обруче́ние бу́дущия жи́зни и ца́рствия. Мне́ же, е́же прилепля́тися Бо́гу, бла́го е́сть, полага́ти во Го́споде упова́ние спасе́ния моего́.

[И еще:]

Ве́чери Твоея́ та́йныя дне́сь, Сы́не Бо́жий, прича́стника мя́ приими́; не бо враго́м Твои́м та́йну пове́м, ни лобза́ния Ти́ да́м, я́ко Иу́да, но я́ко разбо́йник испове́даю Тя́: помяни́ мя́, Го́споди, во Ца́рствии Твое́м.

Благодарственная молитва 1-я

Благодарю́ Тя́, Го́споди, Бо́же мо́й, я́ко не отри́нул мя́ еси́ гре́шнаго, но о́бщника мя́ бы́ти святы́нь Твои́х сподо́бил еси́. Благодарю́ Тя́, я́ко мене́ недосто́йнаго причасти́тися Пречи́стых Твои́х и Небе́сных Даро́в сподо́бил еси́. Но Влады́ко Человеколю́бче, на́с ра́ди уме́рый же и воскресы́й, и дарова́вый на́м стра́шная сия́ и животворя́щая Та́инства во благодея́ние и освяще́ние ду́ш и теле́с на́ших, да́ждь бы́ти си́м и мне́ во исцеле́ние души́ же и те́ла, во отгна́ние вся́каго сопроти́внаго, в просвеще́ние о́чию се́рдца моего́, в ми́р душе́вных мои́х си́л, в ве́ру непосты́дну, в любо́вь нелицеме́рну, во исполне́ние прему́дрости, в соблюде́ние за́поведей Твои́х, в приложе́ние Боже́ственныя Твоея́ благода́ти и Твоего́ Ца́рствия присвое́ние; да во святы́ни Твое́й те́ми сохраня́емь, Твою́ благода́ть помина́ю всегда́, и не ктому́ себе́ живу́, но Тебе́, на́шему Влады́це и Благоде́телю; и та́ко сего́ жития́ исше́д о наде́жди живота́ ве́чнаго, в присносу́щный дости́гну поко́й, иде́же пра́зднующих гла́с непреста́нный, и безконе́чная сла́дость зря́щих Твоего́ лица́ добро́ту неизрече́нную. Ты́ бо еси́ и́стинное жела́ние, и неизрече́нное весе́лие лю́бящих Тя́, Христе́ Бо́же на́ш, и Тя́ пое́т вся́ тва́рь во ве́ки. Ами́нь.

Молитва 2-я, святого Василия Великого

Влады́ко Христе́ Бо́же, Царю́ веко́в, и Соде́телю все́х, благодарю́ Тя́ о все́х, я́же ми́ еси́ по́дал благи́х, и о причаще́нии пречи́стых и животворя́щих Твои́х Та́инств. Молю́ у́бо Тя́, Бла́же и Человеколю́бче: сохрани́ мя́ под кро́вом Твои́м, и в се́ни крилу́ Твое́ю; и да́руй ми́ чи́стою со́вестию, да́же до после́дняго моего́ издыха́ния, досто́йне причаща́тися святы́нь Твои́х, во оставле́ние грехо́в, и в жи́знь ве́чную. Ты́ бо еси́ хле́б живо́тный, исто́чник святы́ни, пода́тель благи́х, и Тебе́ сла́ву возсыла́ем, со Отце́м и Святы́м Ду́хом, ны́не и при́сно, и во ве́ки веко́в. Ами́нь.

Молитва 3-я, преподобного Симеона Метафраста

Да́вый пи́щу мне́ пло́ть Твою́ во́лею, о́гнь сы́й, и опаля́яй недосто́йныя, да не опали́ши мене́, Соде́телю мо́й: па́че же пройди́ во у́ды моя́, во вся́ соста́вы, во утро́бу, в се́рдце. Попали́ те́рние все́х мои́х прегреше́ний. Ду́шу очи́сти, освяти́ помышле́ния. Соста́вы утверди́ с костьми́ вку́пе. Чу́вств просвети́ просту́ю пятери́цу. Всего́ мя́ спригвозди́ стра́ху Твоему́. При́сно покры́й, соблюди́ же, и сохрани́ мя́ от вся́каго дела́ и сло́ва душетле́ннаго. Очи́сти, и омы́й, и украси́ мя́: удобри́, вразуми́, и просвети́ мя́. Покажи́ мя́ Твое́ селе́ние еди́наго Ду́ха, и не ктому́ селе́ние греха́: да от мене́, я́ко от до́му Твоего́, вхо́дом причаще́ния, я́ко огня́ мене́ бежи́т вся́к злоде́й, вся́ка стра́сть. Моли́твенники Тебе́ приношу́ вся́ святы́я, чинонача́лия же безпло́тных, Предте́чу Твоего́, прему́дрыя Апо́столы, к си́м же Твою́ нескве́рную чи́стую Ма́терь, и́хже мольбы́, благоутро́бне, приими́, Христе́ мо́й, и сы́ном све́та соде́лай Твоего́ служи́теля. Ты́ бо еси́ освяще́ние и еди́но на́ших, Бла́же, ду́ш и све́тлость; и Тебе́ ле́потно, я́ко Бо́гу и Влады́це, сла́ву вси́ возсыла́ем на вся́к де́нь.

Молитва 4-я

Те́ло Твое́ свято́е, Го́споди Иису́се Христе́ Бо́же на́ш, да бу́дет ми́ в живо́т ве́чный, и Кро́вь Твоя́ честна́я во оставле́ние грехо́в: бу́ди же ми́ благодаре́ние сие́ в ра́дость, здра́вие и весе́лие; в стра́шное же и второ́е прише́ствие Твое́ сподо́би мя́ гре́шнаго ста́ти одесну́ю сла́вы Твоея́, моли́твами Пречи́стыя Твоея́ Ма́тере, и все́х святы́х.

Молитва 5-я, ко Пресвятой Богородице

Пресвята́я Влады́чице Богоро́дице, све́те помраче́нныя моея́ души́, наде́ждо, покро́ве, прибе́жище, утеше́ние, ра́дование мое́, благодарю́ Тя́, я́ко сподо́била мя́ еси́ недосто́йнаго, прича́стника бы́ти Пречи́стаго Те́ла и Честны́я Кро́ве Сы́на Твоего́. Но Ро́ждшая и́стинный Све́т, просвети́ моя́ у́мныя о́чи се́рдца; Я́же Исто́чник безсме́ртия ро́ждшая, оживотвори́ мя́ умерщвле́ннаго грехо́м; Я́же ми́лостиваго Бо́га любоблагоутро́бная Ма́ти, поми́луй мя́, и да́ждь ми́ умиле́ние и сокруше́ние в се́рдце мое́м, и смире́ние в мы́слех мои́х, и воззва́ние в плене́ниих помышле́ний мои́х; и сподо́би мя́ до после́дняго издыха́ния, неосужде́нно приима́ти пречи́стых Та́ин освяще́ние, во исцеле́ние души́ же и те́ла. И пода́ждь ми́ сле́зы покая́ния и испове́дания, во е́же пе́ти и сла́вити Тя́ во вся́ дни́ живота́ моего́, я́ко благослове́нна и препрославленна еси́ во ве́ки. Ами́нь.

Ныне отпущаеши

Ны́не отпуща́еши раба́ Твоего́, Влады́ко, по глаго́лу Твоему́, с ми́ром: я́ко ви́деста о́чи мои́ спасе́ние Твое́, е́же еси́ угото́вал пред лице́м все́х люде́й, све́т во открове́ние язы́ков и сла́ву люде́й Твои́х, Изра́иля.

Трисвятое по Отче наш

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды и три поклона)

Сла́ва Отцу́, и Сы́ну, и Свято́му Ду́ху. И ны́не, и при́сно, и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй. (Трижды)

Сла́ва Отцу́, и Сы́ну, и Свято́му Ду́ху. И ны́не, и при́сно, и во ве́ки веко́в. Ами́нь.

О́тче наш, И́же еси́ на небесе́х! Да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный даждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Тропарь и кондак святителю Иоанну Златоустому

[Когда совершалась Литургия святого Иоанна Златоустого.]

Тропа́рь, гла́с 8-й:

У́ст твои́х, я́коже све́тлость огня́, возсия́вши благода́ть, вселе́нную просвети́: не сребролю́бия ми́рови сокро́вища сниска́, высоту́ на́м смиренному́дрия показа́, но твои́ми словесы́ наказу́я, о́тче Иоа́нне Златоу́сте, моли́ Сло́ва Христа́ Бо́га спасти́ся душа́м на́шим.

Сла́ва Отцу́, и Сы́ну, и Свято́му Ду́ху.

Конда́к, гла́с 6-й:

От небе́с прия́л еси́ Боже́ственную благода́ть, и твои́ма устна́ма вся́ учи́ши покланя́тися в Тро́ице еди́ному Бо́гу, Иоа́нне Златоу́сте всеблаже́нне, преподо́бне, досто́йно хва́лим тя́: еси́ бо наста́вник, я́ко боже́ственная явля́я.

И ны́не, и при́сно, и во ве́ки веко́в, ами́нь.

Заключительные песнопения и молитвы

И ны́не, и при́сно, и во ве́ки веко́в, ами́нь.

Предста́тельство христиа́н непосты́дное, хода́тайство ко Творцу́ непрело́жное, не пре́зри гре́шных моле́ний гла́сы, но предвари́, я́ко Блага́я, на по́мощь на́с, ве́рно зову́щих Ти́: ускори́ на моли́тву, и потщи́ся на умоле́ние, предста́тельствующи при́сно, Богоро́дице, чту́щих Тя́.

Го́споди, поми́луй. (12 раз)

Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя́ велича́ем.

Сла́ва Отцу́, и Сы́ну, и Свято́му Ду́ху. И ны́не, и при́сно, и во ве́ки веко́в. Ами́нь.

Го́споди, поми́луй. (Трижды)

Го́споди Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, поми́луй нас. Ами́нь.